Salta al contenuto principale
Sa Bandera est Sarda di Roberto Argiolas

Sa Bandera est Sarda di Roberto Argiolas

In s'annu duamizadeghennoe, 

de frealtzu marcade custu mese, 

in su tronu de oro, che sos rese, 

oe incoronamus un'eroe! 

 

A su populu meu sa corona! 

S'eroe mannu est su populu Sardu, 

cuss'umile pastore "pane e lardu" 

de sa notte 'e sos tempos un'icona. 

 

Ponidebos in mente in cust'ora

de "Barbaria" s'antigu sordadu, 

e una chi s'iscudu at impreadu, 

sa manna lumenada Eleonora! 

 

In mesu a mudrecos e a gardu

a preda gurda sos primos cuiles, 

pro sa difesa de custos traziles

fissadu an su primu istendardu. 

 

An fattu fronte in custa malesa

a sos Fenicios e Cartaginesos, 

e prontos a sa morte, mai resos, 

cun s'arma antiga in dentes mantesa. 

 

Su nou invasore at fattu iscola, 

battit su latte da-e s'Ungheria

s'otzu Africanu de sa Tunisia

s'arantzu da-e rotta Ispagnola, 

 

e naves mercantiles da-e Cina, 

cheren custos mercados in sa manu. 

Lassen in paghe s'antigu vulcanu

sa braja est ruja sutta a sa chisina! 

 

Frimmade! Non brulledas cun su fogu, 

sonat in pettu cussu coro sardu, 

non si dissipat unu atter' atzardu 

de sos conchistadores custu giogu. 

 

Tenimus intro sas benas currende

su sambene de su primu pastore, 

a su presente damus su balore

cun sa cara a sos antigos mirende. 

 

Ca semus Sardos de ratza gherrera, 

lassade, non tocchedas custa terra, 

o bos iscadenamus una gherra

in difesa de sa Sarda bandera!

 

Roberto Argiolas 

Oniferi 17/02/19